Animo’y Nasa Bukirin

8kdnmj

animo’y nasa bukirin
habang dinig ang himig
na tila sing harot ng
isang binibining mayumi
ito ang tipo ng tugtog
na dumidikta sa kamalayan
ng isang tulad kong walang
magawa kundi ang managinip
sa gitna ng magulong siyudad
siyudad na kung saan
pinamumugaran ng makabago
di lang ng nilalang kundi ng
material na mga bagay
mga bagay na nagpapabulag
at naglalarawan lamang ng
kahinaan bilang mortal na nilalang
© 2016 Moon Flower

Dito sa Bansa Namin

Ang bayan namin
Mayaman sa likas na yaman
Mapayamang-tubig,  mapayamang-lupa
At, oo, mapayamang-tao…
Pero karamiha’y salat pa rin sa yaman
Dito sa bayan namin
May mga sinaunang bayani
Nangamatay halos sa pakikipaglaban
Masaklap lang, kahit di bayani
Nakikipagpatayan sa kapwa pinoy
Dito sa bayan namin
Ang tawag sa bagong bayani
Ay yaong nagbubuwis buhay
Sa ibang bansa upang buwisan
Ng gobyerno namin
Dito sa aming bayan
Kakaiba ang takbo ng pulitika
Pwede kahit sino ang maghangad
Pwede nga ang sintu-sinto
Ang alien pa kaya?
Dito sa aming bansa
Uso rin ang balimbing
Doble-kara kung tawagin
Parasitismo kung ihahambing
Mabango sa umpisa
Kalauna’y amoy bilasa ka na
Simpleng opurtunista
Ang katawagan dun
Dito sa aming bayan
Uso rin ang reklamador
Reklamo dito,  reklamo dyan
Di nga lang uso ang manalamin
© 2015 Moon Flower

Silent Treatment

‘Di mo naman
kailangan
ipadama ang
“silent treatment”
para ma-miss ka

Ikaw pa rin naman
ang natatangi
ano pa man
ang mangyari

Alam mo naman
kung gaano ka
kaimportante lalo
na sa pandinig ko
mahal kong headset!

© 2015 Moon Flower

Ang Trapiko Sa Pinas

Ang trapiko ay di batayan
Para sabihin na maunlad
Ang isang bayan

Ito ay indikasyon lamang
Ng kakulangan ng disiplina
O kapabayaan ng namumuno

Di na bago ang problemang ito
At di rin lang ito nangyayari sa atin
Kundi sa iba’t-ibang panig ng mundo

Pero sa atin ang pinakamalala
Tayo kasi bukod sa malaki ang bilang
Ng populasyon, sa atin din kasi ang
May mas maraming magagaling
Oo, magagaling mamilosopo
At magagaling mandaya

Parte na rin kasi ng kultura natin yan
Di na maalis yan, at kung maalis man
Di na tayo tatawaging Pinoy

© 2015 Moon Flower

 

Ang Medya sa Pinas

Malaking papel ang ginagampanan
Ng medya sa buhay ng mga Pinoy
Oo, kasama na doon ang laki
Ng responsabilidad sa magkabilang
Panig, tayo bilang tumatangkilik
At silang mga namumuhunan
Para magbigay ng serbisyo
Mas madalas kaysa sa hindi,
Malaki ang naitutulong nito
Kahit anong estado ka pa
Ng sosyudad natin
Subukan mong
Alisin ito
Ano kaya ang mangyayari?
© 2015 Moon Flower